AXELIANE

Skodespelet Axeliane tek utgangspunkt i den reisande kvinna, Axeliane, slike som ofte vart kalla splint eller fant på våre trakter av landet - utan at dette er nokon dokumentar. Men den historiske ramma er korrekt.

Axeliane var ei modig dame, som sloss for sine - og andre reisande sin rett til å vera det dei var - nettopp reisande. Det skulle ho komma til å svi for.

Ho fødde ein son i Leirvik hjelpefengsel i 1878. Sonen, som vart teken frå henne og sett ut i pleie, vart seinare ein kjend kulturjournalist og forfattar, med tilhaldstad i hovudstaden. Axeliane vart send vidare til Christiania Tugthus, etter ein summarisk dom for konkubinat, det vil seia samliv utanfor ekteskap.

Axeliane var kunstnarleg begava og ein framifrå smykkemaker. I tillegg hadde ho ei skarp tunge. Etter at ho kom ut frå Christiania Tugthus, levde ho av å selja produkta sine. Alltid på reisefot. Ho enda sine dagar i eit naust ved Førresfjorden i Nord-Rogaland i 1903.